البدائيات والنهائيات في صنعه الشبكات

أما بعد فقد من الله عز وجل بجوده وكرمه بان يسر لي سبل العلم ورزقني ما جعلني ملما ببعض نواحي العمل بمجال الشبكات Networking وتطبيقاتها بالنسبة للنظم IT
وقد كان مما تعلمتناه من اساتذتنا (وهذا ليس منحصرا في مجال ال IT بمفرده) ان "العلم حاجه و الشغل حاجه تانيه " فكنت كلما مررت بتجربة او احتككت باحد ممن يحاولون دخول مجال ال IT ازددت يقينا بحقيقة هذه المقولة فكم مر علي من خريج كلية او اكاديمية او معهد حاسب الي دبج سيرته الذاتية بعشرات السطور من اللغة الانجليزيه حتى اذا بدأت حواري معه سرعان ما استكملته حول : طيب يابني قوللي تعرف ايه وانا اسالك فيه
وهذا الحائز على شهادة MCSE حتى اذا سألته كيف يضيف Rule على برنامج ISA اذا به يتلجلج ويقول : أصلي بصراحه بقالي كتير ما اشتغلتش عليه
واخر يذكر لك واسطته انه : بيعمل كل شيء في الشبكات حتى اذا طلبت منه ان يخبرك عن ماذا يعلم عن ال Domain Controller غير انه طيب وابن ناس يجيبك معتذرا ان تخصصه الاساسي انه بيعمل وصلات ADSL (او كما يسميها البعض في بلدي اختصارا : دي سي ال)

[فقط الأعضاء المسجلين والمفعلين يمكنهم رؤية الروابط]

وتحول القول وتحور ليصبح (منتديات الكمبيوتر حاجه و ال IT حاجه تانيه) مع الاحتكاك المستمر ببعض الاخوه في المنتديات (وطبعا مع تقديرنا الكامل لما بذلته المنتديات العربية من اثراء لمهمة تبسيط علوم الكمبيوتر على الانترنت) فقد اكتشفت ان هناك فجوة كبيرة جدا جدا بين ما نتعلمه ونعلمه في المنتديات والواقع العملي فهذا قد يكون مشرفا ذائع الصيت في منتدى شهير للكمبيوتر و تكون دروسه وشروحاته رائعة بالفعل (منهم اساتذة لي تعلمت منهم بالفعل) و لكنه يتصبب عرقا اذا ما طلب منه حل بعض المشاكل الاولية في احد اجهزة المستخدمين على الشبكة (سنه اولى IT)
واخر يخبرك بتفاخر ان لديه على ال Hard Diskاكتر من 100 جيجا برامج
- طيب يابني بتعمل بيها ايه
- سورسات
- ايوه يعني بتعمل بيها ايه
- باستخدمها
- (كل هذا وعداد RPM ضغط الدم لديك يتسارع) بتستخدمها في ايه
يرفض الاستسلام ويدخل بيك من اول يمين قائلا : انا عندي برنامج كذا فيرجن رقم كذا

[فقط الأعضاء المسجلين والمفعلين يمكنهم رؤية الروابط]

بصراحه زهقت من كتر النماذج ولكن لا استطيع الا ان اتحدث عن نوعية : ابو هارد نقال فقد سمعت احدهم يؤكد يوما انه لا يستطيع الخروج من بيته الا ومعه الهارد النقال (هارد ديسك 40 جيجا كتب الله له ان يسكن جيب الاخ)
- طيب يابني بتعمل بيه ايه
- يرد : افرض قابلت واحد وحبيت اخد من عنده حاجات ح اخدها ع الهارد النقال
- يعني حاجات ايه يابني
- برامج
- (تبدا العصبية و النرفزة في الظهور) هو انت بتعرف تشتغل على الكمبيوتر
- اه طبعا
- اتعلمته فين
- رباني كده
وبهذا يكون قد تغلب عليك في الجولة الاولى وتركك تبدا الجولة الثانية متاخرا بعدة نقاط فاما أن تنكر قوله وساعتها سيصبح منظرك (شيخ لا موأخذه) او ان تعترف بانه قد تعلم الكمبيوتر (رباني كده) وبهذا فان ابسط حقوقه ان يحمل هارد نقال (وشيل هارد وحط هارد)
واذا ذهبنا في اتجاه اخر لوجدنا مكاتب الكمبيوتر (جلها وليس كلها) وتعاملها الكارثي مع الاجهزة والزبائن بخلاف الامر الاكثر كارثية من معلومات خاطئة يتمنظرون بها على الزبائن وبمرور الوقت تصبح هذه من علوم الكمبيوتر مثل احد اصحاب هذه المكاتب وكان يحدثني عن ان الهارد اذا (هيس) فانه يقوم بعمل (ريجيريتور) له ! أي والله ريجيريتور , وبعد محاولات وتنقيب اكتشفت ان ريجيريتور هذه (وهو الاجراء ال standard بالنسبة لهم) في حالة حدوث اي (تهييس) من الهارد مصطلح مشتق من اسم برنامج HD re generator الخاص بمعالجة ال Bad Sectors في الهارد ديسك , طبعا لو سألني احد اصدقائي عن كيفية عمل ريجيريتورفرددت عليه بانني لا أعلم يعني ايه ريجيريتور فسيزداد يقيننا بانني لا افهم في تهييس الهاردات و بالتالي ما بافهمش كمبيوتر وانه قد بدأ لديه هذا الاحساس عندما حاولت اقناعه بان نسخة ال Norton 2002 التي وضعها له مكتب الصيانة على جهازه غير ذات جدوي وانه اذا كان النورتون بطبعه بيحب الفيروسات ويخاف عليهم زي عياله فما بالنا بنسخة نورتون قد مر عليها خمس سنوات (يعني تقريبا من ايام فيروس تشيرنوبيل)

من أجل هؤلاء ومعهم ابناء واخوة لي اشعر بتقصير تجاههم كلما جمعني الله مع احدهم راغبا في العمل معي او التدريب وفوجئت بانه انفق الكثير (رغما عن ضيق ذات يده) ومستعد لانفاق الكتير في سبيل الحصول على فرصة عمل في مجال احبه ,واجد نفسي بين مفترق طريقين اما ان اقبله على علاته واجد نفسي يوم القيامه مسئولا عن اعطاء عمل لمن لا يستحقه او ارفضه واتحمل نظرات الانكسار والهزيمة في عينيه وقد ازداد احباطا , بل ولربما خرج من عندي وقد اتسعت دائرة البحث لديه عمن يعلمه فيسقط في ايدي احد مراكز التدريب وما ادراك ما مراكز التدريب (بعضها وليس كلها) اثاث فاخر . فتيات بوجوه بلاستيكية وابتسامة (انا اسف) بلهاء والمهم الزبون يدفع ثم يفاجأ بان Zombie هو من يدرس له (مش ح اقول يعني ايه زومبي هي كلمة من التخاريف الامريكية)
وليس ببعيد عن ذاكرتي ذلك الشاب الذي اراد ان يتعلم الكمبيوتر فذهب الى احد المراكز المشهورة (وكان على سعه وعلى نياته ايضا) فقابل السكرتيره وقال لها : عايز اخد دورة اطلع منها باعرف كمبيوتر كويس (يقصد يكون IT) فما كان منه الا ان وجد نفسه بعد بضعة اشهر من الدراسة وبضعة الاف من الرسوم حاصلا على دبلومة سكرتارية .

من أجل هؤلاء استخرت الله وقررت البدء في دروس خاصة بتعليم الشبكات من منظور مختلف بعض الشيء فسأحاول (وارجو الله ان اوفق) ان يكون المنهج مقترنا بصنعه وليس علميا بحتا (وكفانا ما نعانيه من ال MCSE واخواتها وابتعادهم عن واقع وظروف العمل) على ان يتم السير في مراحل الدراسة وكأنها لعبة استراتيجية , مهلا لا تتعجل اخي الكريم وتقول : ترعة المحمودية والدبابات والعصافير
الحكاية انني احب جدا فكرة الالعاب الاسترتيجية (وان كنت للاسف لا اعرف كيف امارسها) ولكنني معجب بفكرة ان تبدأ ضمن اللعبة في انشاء بيت ثم مدينه ثم جيش او ان تجهز ارضا ثم تزرعها ثم تبيع المحصول وكلما انتهيت من مرحلة انتقلت الى الاخرى , وهكذا سيكون منهجنا (باذن الله) لعبة استرتيجية لانشاء منظومة متكاملة , شبكة بمشتملاتها وكلما انتهينا من مهمة بدأنا في الاخرى وذلك حتى يمل احدنا (يا أنا يا انتو) ونبطل اللعبه وان كنت من واقع تجربتي السابقه مع دورة (أصنع نسخة الويندوز الخاصة بك بنفسك) اعلم ان مثل هذه الالعاب لا تنتهي بل تتناثر كما حدث مع الدورة الويندوز وما نجم عنها من كم كبير من نسخ الويندوز المعدلة المصدر
طبعا الهدف الاساسي من هذه الدورة وكما يتضح من اسمها هي تعلم صنعة الشبكات لذا سنجد انفسنا نتحدث عن الصنعه وليس العلم (في اغلب الاحوال) فالهدف هو تخريج اسطى شبكات وليس حامل شهاده
المنهج لن يكتفي بالشبكات من منظور ميكروسوفت بل سنتناول منتجات اخرى مكمله للعمل وهي ما تطلق عليها ميكروسوفت (كل ما تتزنق) مصطلح Third party بل اننا في احيان اخرى (بمشيئة الله) سنطرح منتجات منافسه لمنتجات ميكروسوفت
فالهدف ان نتعلم عمليا كيفية انشاء شبكة بخدماتها Intranet وادارتها وذلك طبعا ضمن اطار اللعبة الاستراتيجية , يعني عملي وكل درس ح نشوف حاجه جديده (خليها عنصر جديد لان حاجه دي كلمة شكلها مش شيك) اتضافت على الشبكة
يعني ح نتعلم (ان شاء الله) ازاي ننزل الويندوز سيرفر وكلاينت (2003 – XP) وازاي نعمل دومين وندخل الكلاينت على الشبكة وبعدين ازاي نعمل Mail Server سواء ببرنامج Exchange او ببرنامج تاني (خليها في وقتها) وطبعا ندخل الانترنت على الشبكة من خلال برركسي سيرفر Proxy Server سواء بال ISA او ببرنامج بديل
وطبعا الباك اب للاجهزة , وازاي كمان نعمل حماية لشغل اليوزر على الشبكة
ومش ح ننسى (باذن الله) ازاي نعمل VPN وازاي كمان نضيف خدمات ال Communications على الشبكة زي ال VoIP و الماسنجر

[فقط الأعضاء المسجلين والمفعلين يمكنهم رؤية الروابط]

يعني الموضوع متشعب بصراحة مش عارف ح ياخد وقت قد ايه وح ينتهي ازاي علشان كده اخترت له اسم " البداية والنهايات في صنعة الشبكات "
وح نحتاج بعض الامكانيات بمعنى ان كل ما اشتغلنا باجهزة اكتر و كانت الشبكة بتكبر قدام عينينا كل ما كان المردود العملي اكتر (اعتقد الاجهزة المستعمله سعرها اصبح رخيص) طبعا البديل هو الشغل على برنامج محاكي زي Virtual PC, طبعا ممكن نتجمع مجموعه من الجيران ونجرب مع بعض , يعني ان شاء الله الحلول موجوده
طبعا الاخوة اللي تابعو دروسي قبل كده عارفين طبعي (عصبي شويه) وما بحبش الفلسفه
وطبعا ياريت بلاش اي حد من الاعضاء الزهقانين يشتمني , مين الاعضاء الزهقانين دول ؟ دول بعض الاعضاء (من ابو خمس مشاركات وعبي الهارد برامج بعدها) تحس انه لما بيطلب منك حاجه وما تعملهاش انك خنقته زهقته وضايقته وان الفلوس اللي دفعها راحت عليه (ما اعرفش فلوس ايه) وانك اتاخرت عليه جدا جدا , انا شفت بعضهم عامل خمس او ست مشاركات في موضوع واحد بيطلب برنامج ومن تاني مشاركة ابتدى تذمر وزهق و من الرابعه ابتدى الشتيمه (بطريقة يا عماره ما فيهاش رجاله) المهم ان كل المشاركات في نفس اليوم , يعني هو متوقع انك قاعد 24 ساعه مركز ومستني انه يطلب برنامج او كراك وما عليك الا انك تنفذ فورا
ما ننساش حاجه مهمه ان الموضوع زي ما قلنا عبارة عن صنعه مش علم بحت , يعني مافيش ان شاء الله جمل من نوعية ( ان استخدام تقنية MAFEESH من شركة MAANDEESH القائمة على تكنولوجيا المنحنيات الافقية عند اتصالها بال Back End الذي قد سبق ان تم التحذير منه ) ولكن ( وتحتها خطين ) المفترض انكم ح تعتبروا الدورة دي عبارة عن مدخل او مقدمه يعني لازم نجمع بين الصنعة و العلم واعرف ان جزء كبير جدا من قيمتك كـ IT بيكون مبني على قدرتك انك تبحث وتقرأ ولو قابلتك مشكله تعرف تدور على حل ليها ومن الحاجات اللي اتعلمناها انه ما فيش IT شاطر من عندوش قدرة على ال Self study طبعا بتحتاج في الاول واحد يفتح لك الباب وده اللي بيحصل في الدورة دي كمان عايز منكم حاجه مهمه مش ح اقول اننا نقرأ ما بين السطور لكن لازم نقرأ السطور يعني المطلوب مننا اننا نركز جدا جدا في كل كلمة مكتوبة واعتقد اني مابطلبش حاجه صعبه لان المنهج كله لو ذاكرته بتركيز ح ياخد منك كام يوم او حتى كام شهر , لكن بعد كده تقدر تتقدم لوظيفة IT Administrator وانت قلبك جامد , انا باطلب الكلام ده وانا عارف ان كتير مش ح يحققوا الكلام ده و ح يشتغلوا بطريقة ( الحته دي انا عارفها خش ع اللي بعدها ) فياريت تساعدوا نفسكم وتهتموا بكل كلمة مكتوبه
طبعا انا بافرح جدا بالاسئلة لان فيه اسئلة بتعتبر اضافات للموضوع وبتثريه لكن فيه اسئلة تانيه من نوع ( عايز سورس ويندوز ) او انا دورت على البرنامج الفلاني ومش لاقيه وياريت تساعدني وتبعتهولي او انا مش عارف افتح ملف امتداده rar طبعا الاسئلة دي بتعطل وقت الزملاء وبتحول الموضوع من دراسة شبكات الى حفلة زهق
كمان مش عايز ناخد الموضوع على صدرنا , يعني الموضوع طويل اصلا فمش محتاج شدة اعصاب وتوتر بل على العكس ح نعتبر انه درس اسبوعي بسيط ومانخليش حياتنا متوقفه عليه لان الموضوع طويل وتقيل (غير دروس نسخة الويندوز) فمحتاج نفس طويل
اخر حاجه : اعتذار اني عامل stamp على صور الشرح وانا بصراحه ماكنتش بحب كده لكن تجربتي السابقه في دروس اسطوانة الويندوز لاقيت الدروس اتنقلت من غير ذكر المصدر ( وبالمناسبه ماعنديش مانع اللي عايز ينقل بدون ذكر المصدر ) والمهم اللي ينقل بيقول ان الشروحات اللي اتقدمت قبل كده فيها عيوب لكن هو بيشرح الموضوع من وجهة نظر متكامله ( شوفوا الكدب ) المهم ان المقدمه بالصور بالروابط بتبقى منقوله فطبعا اضطررت ( حلوه اضطررت ) اني اضع stamp مش حماية للحقوق قد ماهو عند في العيال اللي بتكذب دي
الموضوع ح يكون كبير فدعائكم لي ان استطيع اكماله (مش عارف ح اجيب له وقت منين) وبالطبع الدعاء لأمي وابي بالرحمه والمغفره

والمطلوب منكم لغاية الدرس الجاي تكونوا جهزتم نفسكم ودخلتم في المود و اللي ح يشتغل Virtual يكون نزل البرنامج وجهزه واتدرب عليه كويس

والله المستعان
سبحانك اللهم وبحمدك , أشهد ألا اله الا أنت , أستغفرك وأتوب اليك

يعطيك الف عافية اخوي برهوم بس يا ريت تخلي المواضيع مختصرة وصغيرة